dalub web bi leen di jàppale, ci jàng ak jàng bind làkku wolof

sàqum baat wolof-wolof

maab : létt. su ma amee jot, dinaa la maab.

maabo b- : ràbb b-. sa xarit bi maabo la.

maafe b- : soos bu ñu togge tiga-dege di ko àndale ak ñankataŋ. maafe yàpp la soxna si togg tey.

maajaal : yalwaan, saraxu. baay-faal yi dañuy maajaal añ. dinañuy wax tamit màjjaal wala màjjaan.

maaj : dox ak ay jeego yu dëgër. soldaar saa ngi maaj di ñëw.

maaka m- : xeetu mbaxana, tengaade b-. maaka lay sol buy dem tool.

maal b- : dinañuy wax tamit waxande w-. (seetal waxande)

maam-mbësaan j- : li ñu jàpp ne moo lay teree jóg ci ab lal soo bëggee yeewu. dinañuy wax tamit mbës-mbësaan b-. maam-mbësaan a ko tax a biddanti.

maam-ndëraan b- : katarpalaa b-. ab maam-ndëraan a daane garab yu mag yi fi nekkoon yépp.

maami-koor g- : juroom-benneelu weeru jullit. ci maami-koor gi la fi ñëwoon.

maam j- : maamam am na juroom-ñeen-fukki at.

maamu niiswaan j- : jamono ju njëkk ci nawet juy am fukki fan ak ñett. ci maamu niiswaan ji la jiwoon gerteem gi yépp.

maanaam : nit dafa war a màndu, maanaam bañ a dugg ci lépp lu-dul ay mbiram.

maanaa j- : solo s-. li mu fi wax amul benn maanaa.

maaradéyimsi : maaradéyimsi ! duma lekk ribaa mukk. dinañuy wax tamit maaradéytaali.

maaradéytaali : dinañuy wax tami maaradéyimsi. (seetal maaradéyimsi)

maas 1 : kuraŋ bee ko maas. / tele bi dafay maas.

maas 2 : def ay maaska ci am mbind. soo maasul mbind mi, du neex a jàng.

maaska g- : dinañuy wax tamit maas g-. (seetal maas)

maas g- : nit ki nga tollool ay at, morom m-. man ak moom ay maas lañu.

maat-maate : pamti-pamte. xale yaa ngay maat-maate sàcc ba.

maaxàllaa : baat la bu ñuy wax bu ñu gisee mbir moo xam ne mënul woon a deme neneen nu dul ni mu mujj deme. kon sàcc bi mujj na dee ! maaxàllaa ! dóor yi ko waa dëkk bi dóor dañoo metti.

maayaay b- : fu kenn dëkkul, màndiŋ m-, foore b-. daay gi yóbbu na genn wàllu maayaay bi yépp.

macc : baadoolo xamul macc tàngal, dafa koy yëy.

madiw b- : almasi b-. madiw bi dafa ñëw ngir dimbale jaam ñi.

maf m- : xeetu picc. seen àll ba bare na ay maf.

mag : am ay at yu bare wala yu gën a bare. moo mag ci seen maas gi. / rëy. guy gu mag a nekk ca seen digg dëkk ba.

magum-loolu : nee na du liggeeyi suba, magum-loolu, du sax génn néegam.

makiyaas : dinañuy wax tamit aniin. (seetal aniin)

malaaka m- : Yàlla bind na nit, jinne ak malaaka.

malaan m- : sër b-. yaayam a ko jëndal malaan mi.

mala m- : rab w-. mala mi borom bakkan la ni yow, dawalal yërmaande ci moom.

malastiku : muus mi lekk na jën yi bay malastiku. dinañuy wax tamit melastiku wala melestiku.

mandaxe : dinañuy wax tamit màndaxale wala màndaxe. (seetal màndaxale)

maneebar b- : soo demee poor, dinga fa fekk ay maneebar ñuy yenu saaku.

maniyu m- : wësëq w-. fo na ak ndaw si ba génne maniyu.

man : man na dawal oto. dinañuy wax tamit mën wala mun.

manq : dinañuy wax tamit mànq. (seetal mànq)

mar 1 : mar na yoxoom yi ba ñu set.

mar 2 : aajowoo naan ndox. su ma wooree, dumay xiif, damay mar.

maraaj b- : miir b-. taw bi daane na maraaj bi.

maraakiis b- : xeetu dàll. ay maraakiis yu ñu defaree fii ci réew mi lay jaay.

maraale : jubale. imaam bee maraale ñaari dëkkandoo yi doon jote. safaan wi mooy boole wala féewale.

marañ : tëb. sàcc bi dafa marañ miir bi, dugg ci biir kër gi.

marax s- : timis g-. ci marax si la fi yegsi.

marbat b- : daral b-. soo bëggee nag wu baax, demal marbat ba.

marine : marine na yàpp wi ba mu saf sàpp.

marjaan m- : jamaa b-. borom kër gi jaaykatu marjaan la.

marse b- : ja b-. marse ba lañu dajewoon.

marto b- : àttanul marto juroomi kilo bi.

masaa b- : raay, diw. sooy jàpp, dinga masaa sa kanam gi.

masin b- : jigeeni àll ba war nañu am ay masini wol ak soq.

maslaa : def luy jëmmal ag déggoo, ab jàmmoo. nanga maslaa ay say dëkkandoor.

mas : def dara benn yoon. mas naa nawet Kaasamaas. dinañuy wax tamit mës, mus wala mos.

masoŋ b- : tabaxkat b-. masoŋ war naa am peyoor bu baax.

matat : yëy ay yoon yu bare. fas wi matat na bant bi ba muy bëgg a jeex. dinañuy wax tamit màttat.

maternite b- : deel dem maternite, di def say wisit.

mat : màgg ba bu baax. xar mi mat na léegi. / lu mànkewul dara. kilo bi mat na. / tolloo ak benn lim. li mu def dëkk ba mat na fanweeri fan. / lan la def, ndax dóor yi nga ko dóor mat na ko.

matt m- : bant yu ñuy togge wala jaaroo. àll bi amatul benn matt ndax gorkat yi.

mawlut j- : màggalu juddug yonent Yàlla Muhamet, gàmmu gi. tey la guddig mawlut.

mawti m- : malaakaam dee m-. bul fàtte mukk ne malaaka mawti am na.

max m- : max yi lekk nañu banti sàkket wi yépp.

maxtum m- : saag bu ndaw b-. mu nga sol benn baaylaat, takk maxtum bu rëy.

may-gu-jëkk g- : li ngay may soxna si nga bëgg a takk laata nga koy takk. ñeen-fukki junne la may ndawam si may-gu-jëkk. dinañuy wax tamit may-gu-njëkk g-.

maymaydo b- : jasig g-. maymaydo bi daw na dugg ci biir ndox mi.

may : may na ko xaalis bu bare. safaan wi mooy nangu.